Бу от Үөһээ Дьааҥы таас хайаларын эниэтигэр сөбүлээн үүнэр, кырылас таас быыһыттан чөмөх-чөмөх бөлкөйдүү үүнэн тахсар. Хараҥа от күөҕэ өҥнөөх, намыһах сэбирдэхтээх, үчүгэй сыттаах буолар. Киһи сытынан сирдэтэн булуон сөп.
- Бөрө сиир отун төбө ыарыытыгар, куртах, оһоҕос үлэтэ мөлтөөһүнүгэр, сүрэххэ, сүһүөх дьарҕатыгар, аанньа утуйбат буолууга уо.д.а. тутталлар: биир ыстакаан оргуйбут ууга биир улахан ньуоска оту көөнньөрөн, сойутан, сиидэлээн баран аһыах иннинэ иһиллэр.
- Эмтэнэллэригэр силиһин оргутан эбэтэр настойка оҥорон тутталлар, отун ууга оргутан иһэллэр, сороҕор маас оҥорон соттоллор. Ордук тирии баастарыгар улахан көмөлөөх.
- Былыргы Дьааҥы булчуттарын үһүйээннэриттэн иһиллэринэн, бөрө сиир отун тымныйдахтарына, сүһүөхтэрэ ыарыйдаҕына, араас оһоллонууга, тирии ыарыыларыгар : бааска, кутургуйаҕа, уопсай мөлтөөһүҥҥэ барытыгар тутталлар эбит.
- Бөрө сиир ото күүстээх дьайыылаах отторго киирсэр, онон, бу оту туттарга эмтэнии кээмэйин тутуһар хайаан да наада.
Бөрө сиир отун хомуйарга сиэри-туому тутуһан, айылҕаттан анаан-минээн көрдөһөн эрэ баран хомуйаллар эбит.
- Саха сирин улуу эмчитэ Никон Алексеевич Васильев - Ньыыкан кырдьаҕас бөрө сиир отун үгүс ыарыыга киэҥник туттубута биллэр. Ол курдук, сүһүрэн ыалдьыыга, төрөөбөт дьахталларга, куттанан ыалдьыбыттарга уо.д.а. үгүс ыарыыларга туттубута элбэхтик ахтыллар.
Оттон Никон Алексеевич бэйэтэ арыйыытынан таас отун "бөрө сиир ото" диирэ. Ол туоһутунан, кини бааһырбыт бөрө таас отунан эмтэнэн тыыннаах хаалбытын хас да хонукка кэтээн көрбүт, анаан-минээн үөрэппит уонна ити оту "бөрө сиир ото" диэн ааттаабыт.